சேலத்தில் விவசாயிகள் டிராக்டர் பேரணி
டில்லியில் ஓராண்டுக்குமேல் நடைபெற்ற விவசாயிகள் போராட்டத்தின்போது
ஒன்றிய பாஜக மோடி அரசாங்கம் ஏற்றுக் கொண்ட கோரிக்கைகளை நிறைவேற்றக் கோரி, ஐக்கிய விவசாயிகள் முன்னணி SKM சார்பில், இன்று ஜனவரி 26.1.2023 வியாழன் மாலை 5 மணி அளவில் சேலம் அஸ்தம்பட்டி ரவுண்டானா அருகில் இருந்து டிராக்டர் பேரணி துவங்கியது. டிராக்டர்கள், இரு சக்கர வாகனங்கள் என நூற்றுக்கணக்கான வாகனங்களுடன் அணிவகுத்து சேலம் மாவட்ட ஆட்சியர் அலுவலகம் வரை நடைபெற்றது.
ஊர்வலத்திற்கு ஏ.ராமமூர்த்தி (தவிச மாவட்ட செயலாளர் & SKM மாவட்ட ஒருங்கிணைப்பாளர்) தலைமை தாங்கினார். எம்.லகுமய்யா, (மாநில துணைத்தலைவர், தவிச) டிராக்டர் ஊர்வலத்தைத் துவக்கி வைத்தார்.
ஊர்வலம் முடிவில் கலெக்டர் அலுவலம் முன் தோழர்கள். சந்திரமோகன், (SKM மாநில ஒருங்கிணைப்புக் குழு & AIKM மாநில செயலாளர்), ஆர்.சங்கரய்யா, (ஐவிச., தலைவர்), பி.தங்கவேலு, (மாவட்ட துணைத்தலைவர் தவிச), ஆர்.நடராஜன், (AIKKMS மாவட்ட பொறுப்பாளர்) உள்ளிட்டோர் சிறப்புரை ஆற்றினர்.
பின்வரும் மனு மாவட்ட ஆட்சியர் வழியாக குடியரசு தலைவருக்கு அனுப்பி வழங்கப்படுகிறது.
இந்திய குடியரசுத் தலைவருக்கு - மாண்புமிகு ஆளுநர் மூலம்- நினைவுக் கடிதம்
தேதி: 26 ஜனவரி 2023
திருமதி திரௌபதி முர்மு
குடியரசுத் தலைவர், இந்திய குடியரசு,
ராஷ்டிரபதி பவன்,
புது தில்லி
வழி: மாண்புமிகு ஆளுநர் (மாவட்ட ஆட்சியர் மூலம் ஆளுநருக்கு).
பொருள் : விவசாயிகளுக்கு மத்திய அரசு அளித்த வாக்குறுதிகளுக்கு இழைக்கப்பட்ட துரோகம் குறித்த மனு மற்றும் குறைந்தபட்ச ஆதரவு விலைக்கான சட்ட உத்தரவாதம், முழுமையான கடன் நிவாரணம் மற்றும் பிற கோரிக்கைகள் - பற்றியது.
குடியரசு தலைவர் அம்மா அவர்களே,
இன்று, அரசியலமைப்பு தினத்தையொட்டி, இந்தியா முழுவதும் உள்ள விவசாயிகள், அந்தந்த மாநில ஆளுநர்கள் மூலம், விவசாயிகளுக்கு மத்திய அரசு அளித்த வாக்குறுதிகளை தங்களுக்கு நினைவூட்டுகிறார்கள். சம்யுக்த கிசான் மோர்ச்சா, 21 நவம்பர் 2021 தேதியிட்ட மத்திய அரசுக்கு எழுதிய கடிதத்தில், நிலுவையில் உள்ள ஆறு கோரிக்கைகள் குறித்து அரசின் கவனத்தை ஈர்த்துள்ளது என்பது தங்களுக்குத் தெரியும். இதற்குப் பதிலளிக்கும் விதமாக, 9 டிசம்பர் 2021 அன்று, விவசாயம் மற்றும் விவசாயிகள் நல அமைச்சகத்தின் செயலாளர் திரு. சஞ்சய் அகர்வால், சம்யுக்தா கிசான் மோர்ச்சாவுக்கு ஒரு கடிதம் (செயலாளர்/AFW/2021/Miss/1) எழுதினார். இக்கடிதத்தில், பல பிரச்சினைகளில் அரசு சார்பில் உறுதி அளித்து, போராட்டத்தை வாபஸ் பெற வலியுறுத்தினார். அரசாங்கத்தின் இந்த கடிதத்தை நம்பி, சம்யுக்தா கிசான் மோர்ச்சா, டெல்லியின் எல்லையில் உள்ள முகாம்களையும், அனைத்து எதிர்ப்பு ஆர்ப்பாட்டங்களையும் 11 டிசம்பர் 2021 அன்று அகற்ற முடிவு செய்தது.
இன்று, பதிமூன்று மாதங்கள் கடந்தும், விவசாயிகளுக்கு அளித்த வாக்குறுதிகளை மத்திய அரசு நிறைவேற்றவில்லை. நிலுவையில் உள்ள பிரச்சினைகளை உடனடியாக தீர்க்க உறுதியான நடவடிக்கைகளை எடுக்கவும், விவசாயிகளின் பின்வரும் கோரிக்கைகளை நிறைவேற்றி அவர்களின் பிரச்சினைகளுக்கு கவனம் செலுத்தவும் மத்திய அரசை வலியுறுத்துமாறு மீண்டும் ஒருமுறை கேட்டுக்கொள்கிறோம்.
1. சுவாமிநாதன் கமிஷனின் பரிந்துரையின் அடிப்படையில், C2 + 50 சதவிகித பார்முலாவைப் பயன்படுத்தி, அனைத்து பயிர்களுக்கும் MSP க்கு / குறைந்தபட்ச ஆதார விலை உத்தரவாதம் அளிக்கும் சட்டம். மத்திய அரசால் MSP தொடர்பாக அமைக்கப்பட்ட கமிட்டி மற்றும் அதில் கூறப்பட்டுள்ள நிகழ்ச்சி நிரல் விவசாயிகளின் கோரிக்கைகளுக்கு முரணானது. இந்தக் குழுவை நிராகரித்து, அனைத்துப் பயிர்களுக்கும் MPS-ன் சட்டப்பூர்வ உத்தரவாதத்திற்காக, மத்திய அரசு உறுதியளித்தபடி, SKM-ன் பிரதிநிதிகளைச் சேர்த்து, விவசாயிகளுக்கு உரிய பிரதிநிதித்துவத்துடன், MSP தொடர்பான புதிய குழுவை மீண்டும் அமைக்க வேண்டும்.
2. விவசாயத்தில் இடுபொருள் செலவுகள் அதிகரித்து வருவதாலும், பயிர்களுக்கு உரிய விலை கிடைக்காததாலும், 80 சதவீதத்திற்கும் அதிகமான விவசாயிகள் பெரும் கடனில் சிக்கி, தற்கொலை செய்துகொள்ளும் நிலைக்குத் தள்ளப்பட்டுள்ளனர். இத்தகைய சூழ்நிலையில், அனைத்து விவசாயிகளின் அனைத்து கடன்களையும் தள்ளுபடி செய்ய வேண்டும்.
3. மின்சாரத் திருத்த மசோதா, 2022 திரும்பப் பெறப்பட வேண்டும். டிசம்பர் 9, 2021 அன்று சம்யுக்தா கிசான் மோர்ச்சாவுக்கு எழுதிய கடிதத்தில், “மோர்ச்சாவுடன் விவாதித்த பின்னரே இந்த மசோதா நாடாளுமன்றத்தில் அறிமுகப்படுத்தப்படும்” என்று மத்திய அரசு எழுத்துப்பூர்வமாக உறுதியளித்தது. இருந்தும் மத்திய அரசு எந்த விவாதமும் இல்லாமல் இந்த மசோதாவை நாடாளுமன்றத்தில் தாக்கல் செய்தது.
4. (i) லக்கிம்பூர் கேரி மாவட்டத்தில் உள்ள டிகோனியாவில் நான்கு விவசாயிகள் மற்றும் பத்திரிகையாளரைக் கொன்ற முக்கிய சதிகாரரான மத்திய உள்துறை இணை அமைச்சர் அஜய் மிஸ்ரா தேனி அமைச்சரவையில் இருந்து நீக்கப்பட்டு கைது செய்யப்பட்டு சிறையில் அடைக்கப்பட வேண்டும்.
(ii) லக்கிம்பூர் கேரி படுகொலையில் சிறையில் இருக்கும் அப்பாவி விவசாயிகளை உடனடியாக விடுதலை செய்ய வேண்டும் மற்றும் அவர்கள் மீது பதிவு செய்யப்பட்ட போலி வழக்குகளை உடனடியாக திரும்பப் பெற வேண்டும். உயிரிழந்த விவசாயிகள் மற்றும் காயமடைந்த விவசாயிகளின் குடும்பங்களுக்கு இழப்பீடு வழங்கப்படும் என்ற வாக்குறுதியை அரசு நிறைவேற்ற வேண்டும்.
5. வறட்சி, வெள்ளம், அதிக மழை, பயிர் சார்ந்த நோய்கள் போன்றவற்றால் ஏற்படும் இழப்புகளை ஈடுசெய்ய அனைத்து பயிர்களுக்கும் விரிவான மற்றும் பயனுள்ள பயிர்க் காப்பீட்டை அரசு செயல்படுத்த வேண்டும்.
6. நடுத்தர, சிறு, குறு விவசாயிகள் மற்றும் விவசாயத் தொழிலாளர்களுக்கு மாதம் ₹ 5,000 வீதம் உழவர் ஓய்வூதியத் திட்டம் அமல்படுத்தப்பட வேண்டும்.
7. விவசாயிகள் இயக்கத்தின் போது பாஜக ஆளும் மாநிலங்களிலும், பிற மாநிலங்களிலும், யூனியன் பிரதேசங்களிலும் விவசாயிகள் மீது பதிவு செய்யப்பட்ட போலி வழக்குகளை உடனடியாக திரும்பப் பெற வேண்டும்.
8. விவசாயிகள் இயக்கத்தின் போது வீரமரணம் அடைந்த அனைத்து விவசாயிகளின் குடும்பங்களுக்கும் இழப்பீடு வழங்க வேண்டும் மற்றும் அவர்களுக்கு மறுவாழ்வு அளிக்க ஏற்பாடு செய்ய வேண்டும், சிங்கு முகாமில் தியாகம் செய்த விவசாயிகளுக்கு நினைவிடம் கட்ட நில ஒதுக்கீடு செய்ய வேண்டும்.
இந்த மனுவின் மூலம், நாட்டிற்கு உணவு தருவோர், தங்களது கோபத்தை அரசுக்கு தெரிவிக்க விரும்புகிறார்கள். மத்திய அரசின் எழுத்துப்பூர்வ வாக்குறுதிகளை நினைவூட்டி, நாட்டின் விவசாயிகளின் முழுமையான கடன் நிவாரணம், பயிர்க் காப்பீடு, உழவர் ஓய்வூதியம் போன்ற கோரிக்கைகளை விரைவில் நிறைவேற்றித் தருமாறு கேட்டுக்கொள்கிறோம். விவசாயிகளின் பொறுமைக்கு சவால் விடுவதை நிறுத்துமாறு உங்கள் மூலம் மத்திய அரசை கேட்டுக்கொள்கிறோம். விவசாயிகள் மீதான வாக்குறுதிகளையும் பொறுப்பையும் அரசு தொடர்ந்து மீறினால், விவசாயிகள் போராட்டத்தை தீவிரப்படுத்துவதைத் தவிர வேறு வழியில்லை.
வாழ்க விவசாயிகள்!
இப்படிக்கு,
நாங்கள், இந்திய மக்கள், நாட்டிற்கு உணவு வழங்குவோர்
(சம்யுக்தா கிசான் மோர்ச்சா)
சேலம் மாவட்டம், தமிழ்நாடு.
